Quloqsiz...

 

Qulog'ing «engil» bo'lsin,

Uni «og'ir» qilmagin.

«Quloqsiz» degan nomni

Tamg'a qilib olmagin.

 

Kattalar aytganin qil,

«Labbay!» desang qanday soz!

Insonlarga har doim

«Xo'p bo'ladi!», de, shovvoz!

 

Senga tanbeh berishsa,

Berkit bitta quloqni.

Undan kirib, bundan chiqsa

Eysan achchiq tayoqni!

 

Qulog'ing «engil» bo'lsin...

 

Kichik kosmonavtga

 

Olam qiziq, rango-rang,

Murg'ak aqling lol, hayron.

Moviy osmon ostida

Orzularing bir jahon.

 

Nigohing hayrat bilan

Yulduzlarni teradi.

Oy, Quyosh shu'la sochib

Tushlaringga kiradi.

 

Deydi: kaftingda dunyo

Seniki somon yo'li.

G'avvos bo'lib ilm ter,

Osmon - orzular ko'li.

 

Ota-onang duosin

Olib ishga kirishgin.

Mahkam shimar engingni,

So'ng ishlaring yurishsin.

 

Nigohing chaqnab turar,

Ko'zingda shijoat bor.

Maqsadni dadil qo'ygin,

Tur, o'g'lon, bog'chaga bor!