Avstraliya federatsiyasining tarkibiy tuzilmalaridan biri bo‘lgan Avstraliyaning Shimoliy hududi ma'muriyati odamlarning jinoiy javobgarlikka tortilishi mumkin bo‘lgan yoshni pasaytirdi. Natijada, 10 yoshli bolalar yana panjara ortida qolishi mumkin.

Bu hududda o‘tmishda ham bunday tajribaviy norma mavjud bo‘lgan, biroq so‘nggi paytlarda Avstraliyada shtat va hudud hukumatlariga BMT tavsiyalari va boshqa rivojlangan mamlakatlar misoliga amal qilish va jinoiy javobgarlik yoshini 10 yoshdan 14 yoshgacha ko‘tarish uchun bosim kuchaymoqda.

O‘tgan yili Shimoliy hudud hukumati ushbu maslahatga amal qilib, qamash yoshini 10 yoshdan 12 yoshgacha ko‘tardi. Biroq shu yilning avgust oyida hokimiyat tepasiga kelgan Agrar liberal partiya voyaga yetmaganlar jinoyatiga qarshi kurashish manfaatlaridan kelib chiqib, yoshni yana 10 yoshga tushirish kerakligini aytdi.

Partiyaning ta'kidlashicha, jinoiy javobgarlik yoshini pasaytirish aslida bolalar uchun foydali bo‘ladi, garchi ko‘plab shifokorlar, huquq himoyachilari va mahalliy aholi vakillari bu mantiqqa qo‘shilmasalar ham.

Ularning so‘zlariga ko‘ra, o‘tkazilgan tadqiqot natijalari shuni ko‘rsatmoqdaki, yangi qonunchilik jinoyatchilik darajasini kamaytirmaydi, balki Torres bo‘g‘ozi orolidagi aborigen avstraliyalik va melaneziyalik bolalarga salbiy va nomutanosib ravishda ta'sir qiladi.

Shimoliy hududda bolalarni qamoqqa olish ehtimoli mamlakatning boshqa yurisdiktsiyalariga qaraganda 11 baravar ko‘p, ularning aksariyati mahalliy aholidir.