Isroil harbiy havo kuchlari Livan poytaxti Bayrutga hujum qildi. Hodisa oqibatida besh nafar bola halok boʻlgan, oʻnlab kishilar jarohatlangan, deb yozmoqda Reuters.

Agentlik maʼlumotlariga koʻra, janubiy Daxiya chekkasida uchta kuchli portlash sodir boʻlgan. Livan poytaxti Bayrutda shaharning janubiy chekkasida yashovchilar kuchli portlash ovozini eshitgani haqida xabar berganidan keyin qalin tutun buluti paydo boʻldi.

Xavfsizlik manbalariga koʻra, Isroil Livandagi Hizbulloh guruhining muhim inshootlari yaqinida zarba bergan. Isroil samolyotlari shahar ustida aylanishda davom etmoqda.

Isroil tomoni Hizbulloh guruhining yirik rahbarlaridan biri Ibrohim Oqilning nishonga olinganini iddao qilgan. 

17 va 18-sentyabr kunlari Livanda Hizbulloh tomonidan foydalaniladigan peyjerlarda katta portlashlar sodir boʻldi. Operatsiya uchun javobgarlik Isroil razvedka xizmatlariga yuklangan.