Pokistonlik bir yashar egizaklar Minal va Mirxa Britaniyaning yetakchi jarrohlar jamoasi tomonidan o‘tkazilgan 14 soatlik murakkab operatsiya natijasida muvaffaqiyatli ajratib olindi. Ularning bosh qismi birikib tug‘ilganligi sababli murakkab jarrohlik amaliyoti talab qilindi.

Operatsiya Britaniyaning Greyt Ormond-strit kasalxonasida faoliyat yurituvchi professor Nur ul-Ovase Jilani boshchiligida o‘tkazildi. Ushbu amaliyotda aralash reallik deb ataladigan 3D texnologiyalaridan ilk bor foydalanildi. Operatsiyadan avval qizchalarning 3D modeli yaratilib, bu texnologiya Anqaradagi shifokorlarga operatsiya jarayonini yaxshiroq tasavvur qilishda yordam berdi, Britaniya jamoasiga esa amaliyotga tayyorgarlik ko‘rish imkonini yaratdi.

Jarayon tafsilotlari:

Operatsiya ikki bosqichda amalga oshirildi, so‘nggi bosqichi 14 soat davom etdi. Turkiyaning Anqara shahridagi Bilkent shifoxonasida o‘tkazilgan amaliyotda mahalliy shifokorlar ham qatnashdi. Jarrohlar aralash reallik texnologiyasi yordamida murakkab operatsiyani bajarib, egizaklarning umumiy qon tomirlari va miya to‘qimalarini ajratishga muvaffaq bo‘lishdi.

Yangi texnologiya yordami bilan murakkab operatsiyalar:

AR (aralash reallik) texnologiyasi murakkab operatsiyalar paytida aniqlikni oshirish uchun qo‘llanilib, jarrohlarga bemorni yaxshiroq ko‘rishga yordam beradi. Bunda raqamli ma’lumotlar, masalan, 3D skanerlar reallikka qo‘shilib, operatsiya paytida aniq tasvir beriladi.

Professor Jilani ushbu texnologiyaning xavfsizligi va samaradorligi haqida shunday dedi:

“Bu qizchalarga va ularning oilalariga mustaqil yashash va bolalikdan to‘liq bahramand bo‘lish imkoniyatini taqdim etish — alohida sharaf”.

Oldingi muvaffaqiyatlar va xayriya ishi:

Professor Jilani ilgari ham kraniopag egizaklar bilan bir necha operatsiyalarni amalga oshirgan. Jumladan, 2022 yilda Braziliyada uch yoshli o‘g‘il bolalar, 2021 yilda Isroilda bir yoshli qizlar, 2019 yilda Pokistonlik ikki yoshli qizlar ustida amaliyot o‘tkazgan.

Jarrohlik amaliyotlari Gemini Untwined xayriya tashkiloti tomonidan qo‘llab-quvvatlandi. Ushbu tashkilot Jilanining o‘zi tomonidan, boshi birikib tug‘ilgan aka-uka va opa-singillarni ajratish uchun mablag‘ yig‘ish maqsadida tashkil etilgan.

Siam egizaklar statistikasi:

Gemini Untwined ma’lumotlariga ko‘ra, har 60 000 tug‘ruqdan birida siam egizaklari dunyoga keladi. Ularning atigi 5 foizi kraniopag bolalar hisoblanadi, ya’ni boshlari birikib tug‘ilgan bo‘ladi. Bunday bolalarning hayot davomiyligi qisqa bo‘lib, taxminan 40 foizi o‘lik tug‘iladi yoki tug‘ilish jarayonida nobud bo‘ladi.

Ayni paytda Minal va Mirxa shifoxonada davolanmoqda va kelgusi oylarda Pokistondagi uyiga qaytishi kutilmoqda. Chaqaloqlar to‘liq sog‘ayib, normal hayot kechirishlari mumkin.