Buyuk Britaniyalik 23 yoshli ayol rivojlanayotgan homilasidagi nuqson tufayli bolasini ikki marta tug‘ishga rozi bo‘ldi. “Daily Mail” nashrining xabar berishicha, ayol homiladorligining dastlabki bosqichlarida bolaning umurtqa pog‘onasida jiddiy nuqson borligini bilib olgan. Nuqsonning rivojlanishiga yo‘l qo‘ymaslik maqsadida, homilaning oltinchi oyida jarrohlik amaliyoti o‘tkazilgan.

Jarrohlikda shifokorlar bolani vaqtincha chiqarib olib, nuqsonning bir qismini tuzatgan va keyin homilani qayta joyiga qo‘ygan. Natijada, chaqaloq 38 haftalikda dunyoga kelgan. Yangi tug‘ilgan chaqaloq sakkiz kun reanimatsiya bo‘limida parvarishlangan va bir nechta operatsiyalar o‘tkazilgan.

Shifokorlar chaqaloq katta ehtimol bilan yura olmaydi, deb aytishgan. Biroq, onaning so‘zlariga ko‘ra, bir yil davomida olib borilgan fizioterapiya yordamida farzandining sog‘lig‘i sezilarli darajada yaxshilangan va bu uning kelajakda yurishi uchun umid yaratadi.