Maktabgacha va maktab ta’limi vazirligi Singapurning ta’lim tashkiloti bilan hamkorlikda o‘quvchilarning matematika va tabiiy fanlardan bilimlarini baholash tizimini sun’iy intellektga asoslangan Cerebry platformasi orqali yo‘lga qo‘ydi. Ushbu platforma o‘quvchilarning bilim darajasiga moslashuvchan tarzda savollar berish imkoniyatiga ega bo‘lib, o‘quv jarayonini yanada samarali va individual yondashuv asosida tashkil etishga yordam beradi.

Sun'iy Intellektga asoslangan baholash:

Cerebry platformasi o‘quvchilarning bilim darajasiga mos keladigan savollarni sun'iy intellekt (AI) orqali shakllantiradi. Bu esa o‘quvchilarning individual yutuqlarini kuzatishga va ularning o‘rganish jarayonini samarali tashkil etishga xizmat qiladi. O‘qituvchilar platforma orqali o‘quvchilarga topshiriqlar berib, ularning natijalarini tahlil qilishi mumkin.

Quyidagi imkoniyatlar mavjud:

• O‘qituvchilar va o‘quvchilar kompyuter yoki planshetdan foydalanib, platformadan istalgan joyda turib foydalanishlari mumkin.
• Topshiriqlar o‘zbek, rus va ingliz tillarida tayyorlangan bo‘lib, bu ko‘p tilli ta’lim muhitini qo‘llab-quvvatlaydi.
• Natijalarni real vaqtda monitoring qilish va tahlil qilish imkoniyati mavjud.

Ro‘yxatdan o‘tish va foydalanish:

O‘quvchilar va o‘qituvchilar Cerebry platformasida ro‘yxatdan o‘tishlari kerak. Bu ularga dars jarayonida topshiriqlarni bajarish va natijalarini tahlil qilish imkonini beradi. Hozirgi kunda respublikamiz maktablari o‘quvchilari va o‘qituvchilarining platformaga ro‘yxatdan o‘tish jarayoni davom etmoqda.

Sun'iy intellektga asoslangan bu baholash tizimi ta’lim jarayonida innovatsion yondashuvni ta’minlab, o‘quvchilarning fanlar bo‘yicha bilimlarini yanada chuqurroq o‘zlashtirishga yordam beradi.