Muzqaymoq bolalar uchun sevimli shirinliklardan biri sanaladi, biroq har qanday mahsulot sifatiga e'tibor bermaslik jiddiy sog‘liq muammolariga olib kelishi mumkin. O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasi tomonidan «X XASANBOY VA XOLOD» MCHJ ishlab chiqargan «Xottabich» muzqaymoqlari ustidan o‘tkazilgan nazorat xaridi tadbirlari shuni ko‘rsatdiki, bu mahsulotlar bolalar uchun xavfli hisoblanadi.

Tibbiyot bosh boshqarmasi Sanitariya-epidemiologiya nazorati boshqarmasi laboratoriyasi tomonidan o‘tkazilgan tahlillar muzqaymoqlarda ichak tayoqchasi guruhidagi bakteriyalar mavjudligini aniqladi. Bu bakteriyalar bolalar organizmiga zarar yetkazishi, diareya, ko‘ngil aynishi, ich ketishi kabi og‘ir holatlarga olib kelishi mumkin. Yosh bolalarning immun tizimi hali to‘liq shakllanmagan bo‘lgani uchun bunday bakteriyalar bolalar uchun juda katta xavf tug‘diradi. Bu nafaqat sog‘liq uchun zararli, balki ba'zi holatlarda kasalliklar og‘ir kechishi va tibbiy aralashuv talab etilishi mumkin.

Shuningdek, «TEXNOSTANDART-NEO» MCHJ laboratoriyasida o‘tkazilgan tahlillar muzqaymoq tarkibidagi saxaroza miqdorining qadoqda ko‘rsatilganidek shakarsiz emasligini ochiqladi. Bolalar odatda shirinliklarga o‘ch bo‘lganlari sababli saxaroza miqdorining yuqori bo‘lishi ularning sog‘lig‘i uchun qo‘shimcha xavf tug‘diradi. Qon tarkibida saxaroza (oddiy shakarning bir turi) ko‘payishi bolalarda tish kariyesi, ortiqcha vazn va qandli diabet kabi muammolarni yuzaga keltirishi mumkin.

Bundan tashqari, mahsulotning qadoqlanishida jiddiy kamchiliklar aniqlangan. Bolalar mahsulotini iste'mol qilishda ota-onalar uchun mahsulot haqida to‘liq ma’lumot berilishi juda muhimdir. Biroq «Xottabich» muzqaymoqlarining qadoqlarida bolalar sog‘lig‘iga ta’sir qiladigan muhim ma’lumotlar yetarli darajada ko‘rsatilmagan.

Qadoqda «Muzqaymoqni iste’mol qilish vazningizni kamaytiradi, immunitetni oshiradi va stressdan chiqaradi» kabi noto‘g‘ri ma'lumotlar berilgan. Bunday da'volar hech qanday ilmiy dalillar bilan isbotlanmagan bo‘lib, ota-onalar va bolalar orasida noto‘g‘ri tushunchalar shakllanishiga olib keladi.

Bolalar sog‘lig‘i birinchi navbatda ota-onalar nazoratida bo‘lishi kerak, ammo bozordagi mahsulotlarning sifati va tarkibi ham davlat nazorati ostida bo‘lishi zarur. Shu sababli, “Xottabich” muzqaymoqlari tarkibidan aniqlangan xavfli bakteriyalar va yuqori saxaroza miqdori bolalarning sog‘lig‘i uchun jiddiy xavf tug‘dirishi ma’lum bo‘ldi.

Hozirda to‘plangan hujjatlar O‘zbekiston Respublikasi Vazirlar Mahkamasi huzuridagi Texnik jihatdan tartibga solish agentligiga yuborildi. Ota-onalar bu kabi mahsulotlarni xarid qilishda e'tiborli bo‘lishlari va mahsulot sifatiga doimiy ravishda nazar tashlashlari lozim.