Toshkent viloyati Olmaliq shahridagi MCHJ rahbari Bolalar ombudsmaniga murojaat yo'lladi.

Murojaatida 2022-yilda yakka tartibdagi tadbirkor ayol E.M. bilan MCHJga tegishli binoning bir necha xonalarini nodavlat maktabgacha ta’lim muassasasi sifatida foydalanish uchun ijaraga olish shartnomasi tuzilganligini, lekin tadbirkor o‘z faoliyatida belgilangan talablarga rioya etmayotganligini bildirgan. 

Xususan, tarbiyalanuvchi bolalar soni muassasa sig‘imidan ortiqligi, bolalar uchun yotoqxona, hojatxona va oshxona sanitariya normalariga muvofiq emasligi, ayniqsa bolalar yuqori bosimdagi elektr toki mavjud bo‘lgan xonada saqlanayotganligi va bu xonada deraza mavjud emasligi, oqibatda esa bolalarning sog‘lig‘i xavf ostida qolayotganligini ma’lum qilib, MTMda tarbiyalanayotgan bolalar manfaatlarini himoya qilishni so‘ragan.

Mazkur holat Bolalar ombudsmanining nazorat so‘rovi asosida Toshkent viloyati prokuraturasi, Maktabgacha va maktab ta’limi vazirligi hamda Sanitariya-epidemiologik osoyishtalik va jamoat salomatligi qo‘mitasi tomonidan atroflicha o‘rganildi.

Jumladan, Maktabgacha va maktab ta’limi vazirligi o‘rganishi asosida Vazirlar Mahkamasining “Nodavlat maktabgacha ta’lim tashkilotlariga Davlat byudjeti mablag‘lari hisobidan subsidiyalar va kompensatsiyalar to‘lash tartibi to‘g‘risida” gi tegishli Nizomi talablariga zid ravishda manzili (joylashuv geolokatsiyasi) bitimda ko‘rsatilgan manzildan boshqa joyda faoliyat olib borganligi sababli mazkur oilaviy nodavlat maktabgacha ta’lim tashkilotiga subsidiya to‘lovlari to‘xtatildi.

Shuningdek, Biznes-ombudsman bilan kelishilgan holda mazkur muassasada SSV huzuridagi sanitariya-epidemiologik osoyishtalik va jamoat salomatligi qo‘mitasi tomonidan tekshiruv o‘tkazildi. 

Tekshiruvda aniqlangan kamchiliklar yuzasidan MJtKning 53-moddasi (Sanitariya qonunchiligini buzish) bilan ma’muriy javobgarlik to‘g‘risida ish qo‘zg‘atilib, materiallar jinoyat ishlari bo‘yicha Olmaliq shahar sudiga yuborildi. Hozirda tashkilot faoliyati vaqtincha to‘xtatildi.