7-avgust kuni Sirdaryo viloyati Mirzaobod tumanidagi bogʻchalarning birida 2022-yilda tugʻilgan tarbiyalanuvchi toʻsatdan vafot etgan.
Bosh prokuratura matbuot kotibi Hayot Shamsutdinovning maʼlum qilishicha, sudga oid tibbiy ekspertizada bolaning oʻlimiga nafas yoʻllarining ovqat massasi bilan berkilishi natijasidagi mexanik asfiksiya sabab boʻlganligi aniqlangan.
Holat yuzasidan Mirzaobod tumani prokuraturasi tomonidan tergovga qadar tekshiruv oʻtkazilmoqda.
Voqea sodir boʻlgan oilaviy nodavlat bogʻcha 2023-yilda ish faoliyatini boshlagan, bogʻchada bola qamrovi 25 nafarni tashkil etadi.