Samarqandda aka singlisiga sevgi izhor qilgan oʻquvchini samosud qilgani aytilgan edi. Bolalar ombudsmani matbuot xizmati holat yuzasidan maʼlumot berdi.

Qayd etilishicha, 16-may kuni Past Dargʻom tumani IIBga 2009-yilda tugʻilgan B.S. tan jarohati olgani toʻgʻrisida uning onasi J.I. dan ariza kelib tushgan.

Tergovga qadar tekshiruv davomida aniqlanishicha, voyaga yetmagan B.S. 20-maktabning 9-sinfida taʼlim olishi, u shu maktabning 6-sinf oʻquvchisi boʻlgan qiz Q.A.ga sevishini aytgan. Soʻng qizning akasi A.Q. holatdan xabar topib, 15-may kuni bolani oʻz uyiga olib kirib, unga tan jarohati yetkazgan. Shuningdek, A.Q. yigitning sochi va qoshini qaychi bilan qirqib, uyidan chiqarib yuborgan.

Maʼlumotlarga koʻra, 29-iyul kuni Jinoyat ishlari boʻyicha Pastdargʻom tuman sudida mazkur bolaga zoʻravonlik holatiga oid jinoyat ishi sud muhokamasi koʻrib chiqilib, A.Q. aybdor deb topilib, unga 1 yil 6 oy muddatga ozodlikdan mahrum qilish jazosi tayinlandi.