Bir erkak farzandlarini istirohat bog‘iga olib bordi. Chipta olish uchun kassa oldiga kelib, narxni surishtirdi.
– Olti yoshdan kattalar uchun besh ming so‘m, olti yoshdan kichiklarga bepul. Sizga nechta chipta beray?
– Kichik farzandim uch yosh, kattasi yetti yoshda. Demak, ikkita chipta olamiz, – deya erkak kassirga o‘n ming so‘m uzatdi.
Chiptachi hazilomuz dedi:
– Aka, agar to‘ng‘ich farzandingizni olti yoshda desangiz, men bunga ishongan va pulni tejab qolgan bo‘lardingiz-ku? Bunaqa holat bo‘lib turadi, olti yoshmi yo yetti yoshmi, farqlash qiyin…
– To‘g‘ri, siz payqamasdingiz. Lekin Alloh ko‘rib-bilib turibdi. Bizni kuzatib, gaplarimizni eshitib turgan farzandlarimchi? Arzimas pulni deb farzandlarimni yolg‘onga o‘rgatishni istamayman.
Farzandlarimizga faqat so‘zda emas, amalda ham tarbiya bersak, mukammal natijaga erishamiz.