Ijtimoiy tarmoqlarda yosh bola mashina yukxonasiga solinib, harakatlantirilgani aks etgan video tarqalgandi. Unda mazkur holat Farg‘ona viloyatining Qo‘qon shahrida sodir etilgani aytilgandi.

Ushbu vdeo bo‘yicha o‘rganish ishlarini olib borgan IIB rasmiylari quyidagilarni ma'lum qildi.

Qayd etilishicha, 14-may kuni Qo‘qon shahar Obodyurt ko‘chasida yashovchi voyaga etmagan bola M.M. ushbu mahallada turar joyga ega bo‘lgan qo‘shnisi M.A.ga tegishli uyning devor va oynasiga tosh otib sindirgan. Buni ko‘rgan M.A. bolani qo‘rqitib qo‘yish maqsadida o‘ziga tegishli Nexia-2 yukxonasiga solib avtomashinani harakatlantirgan.

Shu paytda bolaning onasi V.T. ko‘chaga chiqib, mashinani to‘xtatib, farzandini mashinadan tushirib olgan hamda o‘rtada o‘zaro janjal kelib chiqqan.

Mazkur holat yuzasidan fuqaro M.A.ga nisbatan Ma'muriy javobgarlik to‘g‘risidagi kodeksning 183-moddasi tartibida hujjatlar rasmiylashtirilib, tegishli sud organiga yuborish chorasi ko‘rilgan.

«Fuqarolardan vahima va sarosimaga tushmasliklarini hamda ishonchsiz, tekshirilmagan ma'lumotlarni tarqatmasliklarini so‘raymiz», — deyiladi IIB xabarida.