Limfoma — bolalarda saratonning eng keng tarqalgan turlaridan biri. Uning belgilari charchoq, isitma singari grippga xos boʻlgan belgilarga juda oʻxshaydi.

Limfoma tananing har qanday joyida limfa tugunlarining kattalashishi, shuningdek, gepatomegaliya (jigar kattalashishi) va splenomegaliya (taloq kattalashishi) bilan birga kuzatilishi mumkin. Bu holat boshqa kasalliklar bilan ham kuzatilishi mumkin. Shuning uchun kattalashgan limfa tugunlari har doim ham limfomadan darak beravermaydi, ammo ularda sodir boʻlayotgan oʻzgarishlarni eʻʻtiborsiz qoldirib boʻlmaydi.

Charchoq, isitma, ishtahaning yoʻqolishi ham limfoma, ham boshqa kasalliklar uchun xosdir. Bu tashxis qoʻyishda qiyinchiliklarga olib keladi va natijada qimmatli vaqt behuda sarf boʻladi. Limfa tugunlarining kattalashuvi yuqori nafas yoʻllarining infektsiyalari va gripp holatlarida yuzaga kelishi mumkin. Biroq xuddi shu belgilar limfomadan ham darak beradi. Ota-onalar xavfli alomatlarni qanchalik tez sezishsa, oʻz vaqtida tashxis qoʻyish va bolani saqlab qolish imkoniyati shunchalik katta boʻladi.

Bolalarda limfa tugunlarining kattalashishi sogʻliq uchun zararsiz boʻlishi ham, shuningdek, limfoma belgisi boʻlishi ham mumkin. Shuning uchun har bir holatni diqqat bilan koʻrib chiqish kerak. Bundan tashqari, tegishli test, qon tahlili, shuningdek, 2 proeksiyada koʻkrak qafasi rentgeni, UZI, kompʻyuter tomografiyasi va bioptsiya oʻtkaziladi. Bularning barchasi kasallikni oʻtkazib yubormay, oʻz vaqtida tashxis qoʻyish uchun yordam beradi.

Muhim belgilar

Agar infektsiya isitma, vazn yoʻqotish, tungi terlash, kamqonlik va toshmalar, limfa tugunlarining 1 santimetr va undan ortiq kattalashishi bilan birga kuzatilsa, bolaning ahvoliga alohida eʻʻtibor qaratish kerak. Agar tugunlar yumshoq, oson paypaslanadigan, harakatlanuvchan boʻlsa, bu ularning xavfsiz ekanligini anglatadi. Harakatsiz, klaster (toʻp) hosil qiluvchi tugunlar metostatik saraton yoki limfomaning belgisi boʻlishi mumkin.

Quyidagilarni aniq bilish muhimdir:

kasallikning boshlanish vaqti;

uning rivojlanayotgan yoki rivojlanmayotganligini;

kasallik boshlanganidan beri qancha limfa tugunlari kattalashganligini.

Uzoq vaqt davomida hajmi kichraymayotgan tugunlarni bioptsiya qilish orqali tekshirish kerak.

Bolalar oʻrtasidagi kasallanish statistikasi shuni koʻrsatadiki, limfoma eng keng tarqalgan onkologik kasalliklardan biri boʻlib, leykemiya va markaziy asab tizimining oʻsmalaridan keyin uchinchi oʻrinda turadi.

Erta tashxis limfomada hayotni saqlab qoladi va davolashda toʻliq muvaffaqiyatni kafolatlaydi. Shuning uchun oʻz vaqtida tashxis qoʻyish maqsadida bolalarni chuqur tekshirish kerak.

Shifokorlar bolalarga sogʻlom, muvozanatlashtirilgan ovqatlanish, muntazam jismoniy mashqlar qilishni oʻrgatishni tavsiya etadi. Shuningdek, ular chekish joylarida boʻlmasliklari kerak.